Este galardón, que celebra este ano a súa segunda edición, recoñece o esforzo de institucións, empresas e medios de comunicación cara á difusión das novas tecnoloxías da información e as comunicacións.

 

Concretamente, a obtención deste premio pola Comunidade Galega débese á creación do Observatorio TIC, "a partir do cal se están a artellar proxectos para o impulso das novas tecnoloxías nesta comunidade", segundo un comunicado do grupo "Júbilo", ao que pertence a "Guía de Internet y de las Nuevas Tecnologías".

 

Ademais, o comunicado destaca a importancia da posta en marcha do Foro de Extensión da Sociedade da Información e o Comercio Electrónico (Foro SI-Galicia), por medio do cal, asegura, "se están a desenvolver múltiples proxectos, coma o Punto Neutro de Intercambio de Tráfico da Internet en Galicia (galNIX) ou os premios e-Comercio".

 

O xurado deste certame estivo composto polo director xeral para o Desenvolvemento da Sociedade da Información do Ministerio de Ciencia y Tecnología, Jorge Pérez; o presidente de AUTEL, Miguel Ángel Eced; o presidente de ANIEL, Jesús Banegas; o presidente de SEDISI, Josep María Vilà, e a presidenta do Instituto de la Ingeniería de España, María Jesús Prieto, así como por diversos representantes do grupo Júbilo Comunicación.

 

Noutras categorías, resultaron premiados o programa Redes, de Televisión Española, o presidente de honor de Hewlett - Packard, Juan Soto; o servicio PowerLine Communication, desenvolvido por Endesa e Iberdrola; a empresa Indra e o proxecto "Compras vía subasta por Internet", do Grupo Gas Natural.