• UDC:Ramón Doallo
• Cesga: Ignacio López

O traballo a realizar neste proxecto consiste no deseño, desenvolvemento, implementación, probas e difusión dun sistema de computación distribuído baseado en tecnoloxías GRID. O termo GRID foi acuñado nos últimos anos como equivalente ao de metacomputador, e pode ser definido como unha infraestructura de software e hardware que prové do acceso barato, xeneralizado, estandarizado e de calidade a capacidades de computación de alto nivel.

Para os usuarios finais e desenvolvedores de programas un dos aspectos críticos dun GRID é a súa complexidade. O desenvolvemento, depuración e optimización de aplicacións paralelas e distribuídas sobre o GRID faise difícil e tedioso debido á natureza permanentemente cambiante e heteroxénea da infraestructura do GRID.

Os obxectivos fundamentais son:

1. Contar cun contorno GRID distribuído entre a Universidade da Coruña (UDC no que segue) e o Centro de Supercomputación de Galicia (CESGA no que segue) que permita analizar as implicacións deste contorno no referente á xestión de traballos e implantación de aplicacións.

2. Desenvolver, implantar e documentar un front-end para os usuarios finais que permita, mediante a selección de parámetros do traballo a realizar, xestionar o envío de traballos a executar no GRID, fundamentalmente para a execución de aplicacións comerciais de cálculo científico ou enxeñería coas que conta o CESGA (Gaussian, Ansys, MatLab, etc).

3. Analizar a convivencia dos diferentes sistemas de xestión de distribución de traballos (Globus, Condor, etc).

4. Desenvolver unha guía sobre a forma de programar ou adaptar e implantar aplicacións propias ou comerciais nun entorno Grid.

O presente traballo enmárcase dentro da estratexia de soporte de novas tecnoloxías de computación distribuída e a súa implantación en Galicia por parte de ámbalas dúas institucións. Esta estratexia presenta como antecedentes o desenvolvemento do proxecto para o deseño do Superordenador Virtual Galego liderado polo CESGA (xa rematado), e amosa a súa intención de continuidade coa participación activa da UDC e do CESGA (en colaboración coa Universidade de Santiago) coa participación activa na elaboración da proposta dun proxecto máis ambicioso que involucra a 23 institucións de 11 países da Comunidade Europea (proxecto CrossGrid).