O estudo, financiado pola Dirección Xeral de I+D+I, permitiu afondar na utilización didáctica destas tecnoloxías e das súas principais características na nosa autonomía. Galicia, pese a situarse entre as rexións cos índices máis baixos de uso das novas tecnoloxías, ofrece datos moi positivos no referente a este eido.

Case o 80% do profesorado universitario galego fai uso das TIC para o desenvolvemento da súa práctica docente, fundamentalmente, de Terceiro Ciclo e cursos de Posgrao. En canto ao ámbito empresarial, o índice de penetración das TIC é inferior, pero non por iso menos reseñable. O indicador máis representativo establece que o 36% dos empregados das empresas analizadas que reciben formación o fan a través da modalidade de e-Learning.

Ademais, a perspectiva de crecemento do sector é boa. Sinal disto é que o 63% dos consumidores e o 76% dos provedores opinan que o mercado para esta modalidade de aprendizaxe aumentará para os vindeiros anos.

O informe final do Observatorio Galego de e-Learning, así como o seu resumo executivo, están accesibles na Rede a través da páxina web do Observatorio (http://observatorioel.cesga.es). Estes documentos están dispoñibles tanto en versión en galego como en castelán.

Para máis información ver nota de prensa.