Os GIS permiten introducir e actualizar información de distintas fontes, dende a tradicional documentación sobre papel arquivada en departamentos universitarios e institucións públicas ó cargo da xestión dos elementos patrimoniais ata datos de localización GPS ou imaxes tomadas por satélite.

Toda a información recollida nas bases de datos dos GIS encóntrase xeoreferenciada, isto é, cada dato ten asociadas unhas coordenadas xeográficas. Deste xeito, o sistema permite presenta-la información por capas. Así os GIS permiten actualiza-la información, realizar unha análise e xerar novos mapas de forma eficiente, sen necesidade de realizar grandes investimentos. Ademais o sistema permite superpoñer e cruza-los mapas contendo información patrimonial con outros como mapas de pendentes, mapas de risco de inundacións, mapas de planificación de trazado de estradas, mapas de planificación urbanística, mapas de uso de solos, etc. Así, os GIS son hoxe unha ferramenta fundamental para a xestión integral do patrimonio cultural.

Os medios de comunicación, investigadores, xestores e o público en xeral puideron ver unha demostración do sistema creada polo CESGA no stand da Secretaría Xeral de Investigación e Desenvolvemento no SIPAC.