Naceu en Londres. Foi un neno prodixio que viviu marxinado na escola. Pese á súa intelixencia evidente, foi advertido de que se non se aplicaba podía ter un fracaso na obtención do certificado escolar. Na universidade de Cambridge estudiou lóxica matemática. Durante toda a súa vida, gracias a súa capacidade, tería diferentes cargos de responsabilidade en varias universidades e proxectos de investigación do goberno británico.

Turing pode ser considerado o pai da Intelixencia Artificial. O test de Turing utilízase para determinar se unha máquina ten intelixencia. A súa contribución máis importante, base da programación de máquinas electrónicas, é o concepto de Máquina de Turing, unha máquina teórica que sería capaz de transformar con precisión operacións elementais previamente definidas en símbolos nunha cinta de papel, isto é, unha máquina capaz de executar calquera algoritmo. Hoxe en día podemos ver unha Máquina de Turing como un programa informático e a tarefa de interpretación do programa como o traballo que fai o ordenador.

http://ei.cs.vt.edu/~history/TURING.GIF
Alan Turing

http://iseran.ira.uka.de/lehre/rvg-sommer1998/ebp/ebp10a.gif
Colossus

Durante os anos da Segunda Guerra Mundial Alan Turing colaborou co goberno británico nun proxecto segredo que sería vital para a victoria aliada en Europa. Tratábase do deseño dunha máquina chamada Bomba pensada para descifrar os códigos que os alemáns usaban nas súas mensaxes secretas xeradas pola codificadora Enigma. Tamén traballou no desenvolvemento do Colossus.

Pese ó seu traballo para o goberno en contra do nazismo e todos os seus descubrimentos que impulsaron fortemente a historia da ciencia, Turing, homosexual, foi repudiado pola intolerante sociedade da súa época. O 8 de xuño de 1954, logo de ser condenado pola súa homosexualidade a un tratamento médico-farmacéutico equivalente á castración, o corpo de Turing foi atopado pola súa asistente. Ó seu carón había unha mazá chea de cianuro. O dictame do forense foi taxante: suicidio.