John Vincent Atanasoff naceu en Nova Iork. Seu pai era un enxeñeiro eléctrico chegado ós Estados Unidos dende Bulgaria e a súa nai unha mestra de escola que transmitiu ó seu fillo a paixón polas matemáticas. Atanasoff doutorouse en física teórica e impartiu clases na universidade de Iowa. Un dos grandes problemas que tiñan os físicos da súa época era a inmensa cantidade de cálculos que tiñan que facer. Atanasoff, afeizoado á electrónica e coñecedor da máquina de Pascal (A Pascalina), decidiu construír unha máquina calculadora dixital que simplificase os problemas matemáticos que tiñan que resolver os físicos.

A grande aportación de Atanasoff á historia da computación foi o seu concepto de Computadora Electrónica Dixital. Este concepto naceu nunha taberna de Iowa, onde Atanasoff definiu os catro preceptos básicos que debía cumprir a súa máquina: usaría electricidade e compoñentes electrónicos, estaría baseada nun sistema binario, empregaría condensadores para almacenar datos e tería un sistema lóxico para o cómputo e non para a enumeración. O primeiro prototipo da súa máquina, feito coa colaboración do entón estudiante Clifford Berry, chamouse ABC (por Atanasoff Berry Computer) e foi rematado en decembro de 1939.

O deseño desta máquina incorporaba tubos electrónicos ó baleiro, en lugar do que se utilizaba ata entón: interruptores tipo relé, que tiñan como función prioritaria abrir e pechar circuítos.
Existe unanimidade á hora de atribuír a paternidade das computadoras dixitais a John Mauchly e Prespert Eckert, constructores do ENIAC. Sen embargo, un xuíz federal dos Estados Unidos atribuíu nos anos 70 esta paternidade a John Atanasoff debido ó seu traballo, xunto con Clifford Berry, na máquina que se chamaría ABC, en 1939, varios anos antes de que se rematara a construcción do ENIAC.
En decembro de 1940, Mauchly e Atanasoff atopáronse nunha reunión da Asociación Americana para o Avance da Ciencia. Pouco despois do seu encontro do ano 40 Mauchy escribíu a Atanasoff solicitándolle a súa colaboración no proxecto para a construcción o ENIAC. Atanasoff non aceptou a oferta e preferíu manter a súa máquina ABC en certo segredo ata lograr patentala, pero nunca conseguiu facelo.

© CESGA, Centro de Supercomputación de Galicia. 2003