O obxectivo deste seminario é o de potenciar o coñecemento existente sobre as Plataformas Tecnolóxicas e destacar o papel das empresas e os grupos de I+D+i dentro delas.

No transcurso da xornada, presentáronse algunhas das Plataformas Tecnolóxicas de especial relevancia para Galicia e promoveuse a participación de todos os axentes da I+D+i para contribuír ao desenvolvemento destas Plataformas.

Tamén se sentaron as bases para establecer unha rede de información e colaboración directa, facilitando o contacto entre os participantes e os técnicos a través de entrevistas individuais e da creación dunha lista de distribución.

Ao seminario asistiron máis dun cento de persoas, así como representantes de empresas (42); Centros Tecnolóxicos (11); Universidades (representantes das tres Universidades galegas e un representante da Universidade de Málaga) e tres representantes de Organismos Públicos de Investigación. Polo que respecta aos sectores empresariais que tiveron unha maior presenza no encontro, destaca o sector do Software e das TIC, con oito representantes. Seguíronlle os sectores de Tecnoloxía Mariña e Produtos do Mar, Consultorías e Asesoramento Empresarial, Sector Medio Ambiental e Sector Agroalimentario, con seis representantes. O Sector da Construción estivo presente na xornada con cinco representantes, o Sector Naval con tres e a Biomedicina con dous.

A posta en marcha deste seminario sobre Plataformas Tecnolóxicas posibilitou, así mesmo, que se concertaran 41 entrevistas das 48 solicitadas (as sete restantes non se puideron concertar debido á apretada axenda da xornada e ao elevado número de solicitudes). Estas entrevistas distribúense do seguinte xeito entre os sectores participantes: o número máis elevado, oito entrevistas, correspóndelle á Plataforma Tecnolóxica Agroalimentaria Galega e á Rede OTRI galega. Con seis entrevistas quedáronse o CDTI sobre Plataformas Tecnolóxicas e os Centros Tecnolóxicos –CETMAR, CIS-MADEIRA e AIMEN-; cinco correspondéronlle á Plataforma Tecnolóxica da Construción e á Plataforma Tecnolóxica de Software de Servizos. E, finalmente, concertáronse tres entrevistas con CDTI sobre a Plataforma Tecnolóxica Manufuture.