• María Rosario Méndez Gil e José Carlos Fernández Balseiro. Departamento de Enxeñería Química. Universidade de Santiago de Compostela.
• Emilio Abad, CESGA.

As investigacións realizadas para comprende-los fenómenos de precipitación ácida inclúen unha combinación de experimentos de laboratorio, experimentos de campo e análise de modelos. Os primeiros, proporcionan a base de datos de procesos químicos e físicos individuais. Os segundos realízanse para estudiar un número limitado de procesos atmosféricos baixo condicións nas que algúns procesos son dominantes. E os últimos permiten realizar análise de datos de procesos que ocorren simultáneamente. Os modelos STEM desenvolvéronse para proporcionar unha base teórica para o estudio das relacións entre emisións, transporte atmosférico, procesos químicos e de cambio, e a distribución resultante dos contaminantes no aire e os patróns de deposición.

Durante este ano, realizouse o traslado do STEM-II ó VPP300 e ó AP3000. Adaptáronse o modelo fotoquímico para traballar con información do contorno, emisións procedentes da Central Térmica das Pontes, e información meteorolóxica. Executouse o modelo durante o 21 de maio de 1997, considerando inicialmente soamente o transporte de contaminantes e posteriormente o transporte e a química en fase gas, de forma que se pode determina-la influencia das reaccións en fase gas na conversión de SO2 a SO42- no contorno da Central Térmica das Pontes, así como verifica-la simulación para outras especies (NOx, O3, ...). O contorno de estudio está localizado en Galicia. Esta é unha rexión caracterizada polas súas elevadas precipitacións, polo que se considerou de grande importancia executa-lo modelo incluíndo tanto química en fase gas como química en fase acuosa, de forma que se poida compara-la conversión de SO2 a SO42- e de NOx a NO3- tendo en conta a fase acuosa ou non, e coñecer ademais a deposición seca dos contaminantes en todo o contorno.